September 25, 2018 स्वानंदचक्रवर्ती

फलटणचे थोर सत्पुरुष प.पू.सद्गुरु श्री.गोविंदकाका उपळेकर महाराज हे विसाव्या शतकातील एक महान विभूतिमत्त्व. राजाधिराज श्रीअक्कलकोट स्वामी समर्थ महाराजांच्या परंपरेतील विलक्षण अधिकाराचे एक विदेही स्थितीतील महात्मे म्हणून प.पू.श्री.काका सर्वज्ञात आहेत. त्यांचे अलौकिक चरित्र व अर्थपूर्ण वाङ्मय हा अभ्यासकांसाठी मोठा खजिनाच आहे.
प.पू.श्री.काकांची सात चरित्रे आजवर प्रकाशित झाली, परंतु त्यातील एक सोडता बाकीची सर्वच अनुपलब्ध आहेत. म्हणून पू.काकांचे अल्पचरित्र व काही भक्तांच्या आजवर प्रकाशित न झालेल्या हृद्य आठवणी, अनोख्या चमत्कारसदृश अनुभूती आणि प्रेमादराच्या काही हकिकती एकत्रित स्वरूपात स्वानंदचक्रवर्ती या ग्रंथाच्या माध्यमातून पू.काकांच्या पुण्यतिथी दिनी, दि.२ ऑक्टोबर २०१८ रोजी प्रकाशित करीत आहोत. तसेच पू.काकांच्या अमृतमय वचनांवरील विवरणात्मक लघुलेखही याच ग्रंथात समाविष्ट आहेत.
संतवाङ्मयाचे ज्येष्ठ अभ्यासक व श्रीस्वामी समर्थ महाराजांच्या परंपरेचे अध्वर्यू प.पू.श्री.शिरीषदादा कवडे यांची, पू.काकांच्या मनोहर अंतरंग स्थिती आणि माहात्म्याचा यथार्थ परामर्श घेणारी सुरेख प्रस्तावना ग्रंथाला लाभलेली आहे. तसेच यात समाविष्ट केलेली पू.काकांची काही चित्ताकर्षक छायाचित्रेही ग्रंथाची शोभा वाढविणारी ठरतील.
एकूण ११२ पृष्ठांचा हा ग्रंथ अवघ्या पन्नास रुपये एवढ्या छापील मूल्यात सेवा म्हणून उपलब्ध करून दिला जात आहे. प्रकाशनाच्या निमित्ताने विशेष सवलतीत सदर ग्रंथ ₹ ४० /- मध्ये भाविकांना उपलब्ध होईल.  मंगळवार दि.२ ऑक्टोबर रोजी फलटण येथील प.पू.श्री.काकांच्या समाधिमंदिरात सकाळी ९.३० वाजता होणा-या प्रकाशनाच्या कार्यक्रमास आपण सर्वांनी आवर्जून उपस्थित राहून आमचा आनंद द्विगुणित करावा ही विनंती. स्वानंदचक्रवर्ती हा ग्रंथ प्रकाशनानंतर मंदिरात विक्रीसाठी उपलब्ध असेल. तसेच कुरियर अथवा पोस्टानेही ग्रंथ मागवता येऊ शकेल. ज्यांना ग्रंथ पोस्टाने/कुरियरने हवा आहे, त्यांनी कृपया खालील व्हॉटसप क्रमांकांवर आपला पत्ता व फोननंबर मेसेज करून माहिती घ्यावी ही प्रार्थना.
संतचरित्रे साधकांबरोबरच सर्वसामान्य जनांनाही बोधप्रद असतात, मार्गदर्शक ठरतात. म्हणूनच परमार्थ करू इच्छिणा-या साधकांनी संतचरित्रांचे वारंवार मनन-चिंतन करीत राहावे असे सांगितले जाते. या दृष्टीने स्वानंदचक्रवर्ती महत्त्वाची भूमिका बजावेल अशी आम्हांला मनापासून खात्री वाटते.
ग्रंथासाठी संपर्क :
रोहन उपळेकर : 8888904481
प्रसाद पत्की : 9922507547