April 07, 2019 राजाधिराज श्रीअक्कलकोट स्वामी समर्थ महाराज प्रकटदिन !

आज चैत्र शुद्ध द्वितीया, पूर्णपरब्रह्म राजाधिराज सद्गुरु श्रीअक्कलकोट स्वामी समर्थ महाराजांचा प्रकटदिन आहे. श्रीस्वामी महाराज आजच्याच तिथीला सूर्योदयसमयी हस्तिनापूर जवळील छेली या खेडेगावी आठ वर्षांच्या बालरूपात इ.स.११४९ मध्ये प्रथम प्रकटले होते. आज त्यांचा ८७१ वा प्रकटदिन आहे.
राजाधिराज श्रीस्वामी महाराज हे खरोखर अत्यंत विलक्षण अवतार आहेत. त्यांचे समग्र चरित्र व लीला या मानवी बुद्धीच्या पलीकडेच आहेत. जिथे आपली बुद्धी संपते तिथेच त्यांची लीला सुरू होते. त्यांचे भक्तवात्सल्य हे इतके अद्भुत आहे की, नुसती कळवळून त्यांना हाक जरी मारली तरीही ते सर्व बाजूंनी त्या भक्ताचा सांभाळ करतातच !
श्री स्वामी समर्थ महाराजांच्या जन्माचे रहस्य सांगून त्यांच्या भक्तकामकल्पद्रुम प्रेमवात्सल्याचे सुरेख वर्णन करणा-या श्री स्वामीसुत महाराजांच्या अभंगावरील विवेचन खालील लिंकवरील लेखात मांडलेले आहे, आपण आजच्या पावन दिनी त्याचा आवर्जून वाचन करून श्रीस्वामीचरणीं प्रेमादरपूर्वक दंडवत घालावा ही विनंती.
अवतार समर्थ झाला असे
https://rohanupalekar.blogspot.com/2017/03/blog-post_29.html?m=1

राजाधिराज श्रीस्वामी महाराजांचे दिव्यपावन नाम हे भवरोगाचे रामबाण औषध आहे. या अलौकिक अधिकारसंपन्न नामाचे यथार्थ माहात्म्य, श्रीस्वामी समर्थ महाराजांचे पूर्ण कृपांकित सत्पुरुष प.पू.सद्गुुरु श्री.शिरीषदादा कवडे यांनी आपल्या "श्रीस्वामीसमर्थ नामपाठ" या सुरेख रचनेत सविस्तर मांडलेले आहे. या नामपाठातील एकोणिसाव्या अभंगावरील अल्पसे विवेचन खालील लिंकवरील लेखात केलेले आहे. त्यातून श्रीस्वामी समर्थ महाराजांच्या प्रेमभावे केलेल्या भक्तीचे व नामाचे महत्त्व आपल्या ध्यानी येईल. त्याचेही वाचन आजच्या पुण्यदिनी करावे ही विनंती.
स्वामीनाम तारू स्वामी कल्पतरू
https://rohanupalekar.blogspot.com/2018/03/blog-post_22.html?m=1