April 06, 2019 उभवी गुढी सुखाची

श्रीमन्नृपशालिवाहन शके १९४१, विकारी नाम हिंदू नवसंवत्सराच्या सर्वांना मन:पूर्वक शुभेच्छा !!
सध्या गुढीपाडवा हा शब्द नुसता म्हटला रे म्हटला की लगेच अनेक गाढवे केकाटू लागतात. उगीच नाही आपल्या पूर्वजांनी, "गुढीपाडवा नीट बोल गाढवा ।" ही म्हण प्रचलित केलेली आहे. दुर्दैवाने आज मात्र तीच सत्य होताना दिसते आहे.
गुढी पाडवा हा आपला प्राचीन काळापासून साजरा होणारा सण आहे. आपल्या सर्व संतांनी गुढीचा वारंवार उल्लेख केलेला आहे. गुढी उभारणे हे आपला आतला आनंद बाहेर व्यक्त करण्याचे प्रतीक आहे. त्यामुळेच फक्त वर्षप्रतिपदेला गुढी उभारतात, हेही मत बरोबर नाही. श्रीसंत तुकाराम महाराज श्रीकृष्णजन्माच्या अभंगात स्पष्ट म्हणतात की,
गोकुळीच्या सुखा ।
अंतपार नाही लेखा ॥१॥
बाळकृष्ण नंदाघरी ।
आनंदल्या नरनारी ॥२॥
गुढिया तोरणे । 
करिती कथा गाती गाणे ॥३॥
भगवान श्रीगोपालकृष्णांच्या आगमनाने आनंदित झालेल्या गोकुलवासियांनी गुढ्या-तोरणे उभारून आपला आनंद व्यक्त केला होता. यावरून गुढी उभारणे हे आनंद व्यक्त करण्याचे प्रतीकच आहे, हे स्पष्ट दिसून येते.
आजच्या विकारी नाम संवत्सराच्या निमित्ताने आपणही सर्वजण श्रीभगवंतांच्या नामाची गुढी उभारून आपला आनंद व्यक्त करू या ! सर्व वाचकांनी खालील लिंकवरील लेखातील गुढीपाडव्याचे माहात्म्य सांगणा-या संतवचनांचा तसेच प.पू.श्री.शिरीषदादा कवडे यांनी कथन केलेल्या गुढीच्या अलौकिक गूढार्थाचाही आवर्जून आस्वाद घ्यावा ही विनंती. त्याद्वारे आपल्या परमश्रेष्ठ भारतीय संस्कृतीच्या या सुखदायक वर्षप्रतिपदेनिमित्त सर्वांसाठी मंगलकामनाही व्यक्त करू या !!
टाळी वाजवावी गुढी उभारावी
https://rohanupalekar.blogspot.com/2018/03/blog-post_18.html?m=1