April 20, 2019 चैत्र पौर्णिमा !

बलभीम अंजनीसुत पवनतनय श्रीरामदूत भक्तराज श्रीमारुतिरायांची आज जयंती !
बुधकौशिक ऋषी आपल्या अतिशय प्रभावी अशा श्रीरामरक्षा स्तोत्रात श्रीरामदूत मारुतिरायांची स्तुती करताना म्हणतात,
मनोजवं मारुततुल्यवेगं जितेन्द्रियं बुद्धिमतां वरिष्ठम् ।
वातात्मजं वानरयूथमुख्यं श्रीरामदूतं शरणं प्रपद्ये ॥
"मनाप्रमाणे सर्वत्र अनिर्बंध गती असणा-या, वायूप्रमाणे अतीव वेगवान, आपल्या सर्व इंद्रियांवर पूर्ण ताबा मिळवलेल्या, जगातील सर्व बुद्धिमानांमध्येही श्रेष्ठ, पराक्रमी वानरांच्या सैन्याचे प्रमुख असणा-या, श्रीरामरायांचे सुयोग्य दूत वायुसुत श्रीमारुतिरायांच्या चरणीं मी सर्वभावे शरण आहे !"
बुधकौशिकांनी येथे अत्यल्प शब्दांत भगवान श्री हनुमंतांची सर्व लक्षणे स्पष्ट सांगितलेली आहेत. खरोखरीच, श्रीमारुतिराय हे सर्वश्रेष्ठ दासोत्तम आहेत ! आज त्यांचा जयंती दिनी आपण सर्वांनी त्यांच्या पुण्यपावन श्रीचरणीं नतमस्तक होऊ या !
भगवान श्रीरामरायांनी आपल्या मागे आपल्या दासांची, हरिभक्तांची काळजी वाहण्याचे अतिशय जबाबदारीचे कार्य आपल्या या सर्वश्रेष्ठ चिरंजीव दासाला प्रेमादरपूर्वक व खात्रीने बहाल केलेले आहे. श्रीरामरायांच्या विश्वासाला किंचितही तडा जाऊ न देता, श्रीरामदूत देखील ते भगवत्प्रदत्त सेवाकार्य नामरंगी रंगून जाऊन आजही तितक्याच निष्ठेने व प्रेमाने करीत आहेत. त्यांच्या आपल्यावरील ह्या एवढ्या मोठ्या उपकाराची आपण भक्त कधी परतफेड करूच शकत नाही. कारण त्यांच्या कृपाऋणात राहण्यातच आपले सर्वथा हित आहे. म्हणूनच, आजच्या त्यांच्या जयंतीच्या पुण्यदिनी, भक्तराजोत्तम भगवान श्रीमारुतिरायांची आपण रामनाम गात मनापासून करुणा भाकू या आणि दासोत्तम म्हणून त्यांच्याच सद्गुणांचे सदैव चिंतन करून त्यातले काही प्रमाणात तरी आपल्याही जीवनात प्रयत्नपूर्वक उतरवू या !!
दासोत्तम-शिखामणी भगवान श्रीमारुतिरायांच्या अशाच काही सद्गुणरत्नांचे अल्पसे चिंतन पुढील लिंकवरील लेखात आहे, ते चिंतन-मननासाठी आपल्यासमोर सादर करीत आहे.
श्रीरामदूतं शरणं प्रपद्ये
https://rohanupalekar.blogspot.com/2018/03/blog-post_31.html?m=1