July 28, 2018 श्रीगुरुपौर्णिमा - पूर्वार्ध

आज श्रीगुरुपौर्णिमा !
तुम्हां-आम्हां सद्गुरुभक्तांचा सर्वोच्च सण, अत्यंत आनंदाचा दिवस.
प्रत्येक गुरुभक्त आजच्या दिवसाची वर्षभर वाट पाहत असतो, असे म्हटले तर वावगे ठरू नये. खरोखरीच, श्रीगुरुपैर्णिमेचा दिवस अत्यंत आनंदाचा व समाधानाचाच असतो.
आजचा परमपावन दिवस आपण आपल्या श्रीसद्गुरूंच्या स्मरणात, त्यांच्या अनुसंधानातच व्यतीत करायचा असतो व आपण तसेच करतोही. तोच खरा आनंदाचा ठेवा असतो.
श्रीसद्गुरु हे तत्त्व आहे. साक्षात् श्रीभगवंतांची परमकरुणामयी अनुग्रहशक्ती म्हणजेच श्रीसद्गुरु. ज्या देहाच्या आश्रयाने हे सनातन तत्त्व आपल्यावर कृपाप्रसाद करते तो पुण्यदेहही आपल्यासाठी नित्यवंदनीय, नित्यपूजनीयच असतो. देहाच्या आधाराने प्रकटलेल्या या मूळच्या विदेही परब्रह्माचे अर्थात् श्रीगुरुस्वरूपाचे आजच्या तिथीला आपण मनोभावे पूजन, वंदन, स्मरण, सेवा व दास्य करून आपला जन्म धन्य करायचा असतो. म्हणूनच, प्रत्येक गुरुभक्तासाठी श्रीगुरुपौर्णिमेचा हा महोत्सव विशेष आनंददायीच असतो.
श्रीगुरुतत्त्व हे बोलाबुद्धीच्या पलीकडचेच असल्याने त्याचे यथार्थ आकलन होणे केवळ अशक्यच आहे. तरीही विविध महात्म्यांनी आपल्या वाङ्मयातून आजवर या करुणाब्रह्माचा यथाशक्ती अनुवाद केलेला आहे. सद्गुरुतत्त्वाचे करुणामय स्वरूप, त्या तत्त्वाच्या विविध व्याख्या, त्याचे भेद व श्रीगुरूंचे अलौकिक कृपासामर्थ्य या सगळ्यांचा धांडोळा आजवरच्या अनुभवी संतांनी घेऊन ठेवलेला आहे. भगवान सद्गुरु श्री ज्ञानेश्वरमाउली, प.पू.श्री.गोविंदकाका उपळेकर महाराज व प.पू.श्री.मामासाहेब देशपांडे महाराजांसारख्या महात्म्यांनी वर्णिलेल्या त्या विलक्षण श्रीगुरु-गुणगौरवाचा, प.पू.सद्गुरु श्री.शिरीषदादा कवडे यांच्या एका भावगर्भ व सुमधुर अभंगाच्या माध्यमातून रसास्वाद घेण्याचा सादर प्रयत्न खालील लिंकवरील लेखात केलेला आहे. हा त्या लेखाचा पूर्वार्ध आहे. उत्तरार्ध आपण उद्या पाहू.
सर्वांच्या वतीने ही सप्रेम आणि भावपूर्ण शब्दसुमनांजली, करुणाब्रह्म श्रीसद्गुरूंच्या श्रीचरणीं श्रीगुरुपौर्णिमेच्या पावन पर्वावर सादर समर्पितो व त्याच अम्लान सर्वतीर्थास्पद श्रीचरणीं तुलसीदल रूपाने विसावतो.
गुरु नाही नाशिवंत...पूर्वार्ध
https://rohanupalekar.blogspot.com/2016/07/blog-post_19.html?m=1
लेखक - रोहन विजय उपळेकर
भ्रमणभाष - 8888904481